[sam_zone id=1]

Hamarsmenn sannfærandi á Akureyri

Hamarsmenn sóttu KA heim á Akureyri í Mizunodeild karla í kvöld.

Lið Hamars vann sinn fyrsta leik gegn Þrótti Nes 3-0 en heimamenn í KA höfðu enn ekki spilað leik þar sem að leik þeirra gegn Fylki var frestað. Lið KA leit þó vel út á ofurbikar BLÍ sem fór fram á þeirra heimavelli. Það var því útlit fyrir æsispennandi leik á Akureyri og fyrsta hrina leiksins olli engum vonbrigðum. KA hafði nauma forystu lengst af en Hamar jafnaði um miðja hrinu. Þeir skoruðu svo síðustu tvö stigin og tryggðu 23-25 sigur.

Hamar byrjaði aðra hrinu enn betur og komst 0-5 yfir. Gestirnir juku forystuna smám saman eftir því sem leið á hrinuna og vann örugglega, 17-25. Þriðja hrinan var nokkuð lík annarri hrinunni og hafði Hamar þægilegt forskot þangað til undir lokin. KA átti frábæra endurkomu en Hamar vann þó að lokum 22-25. Gestirnir unnu því 0-3 sigur og fara á topp deildarinnar með tvo 3-0 sigra úr tveimur leikjum.

KA TV tók tölfræði af leiknum og samkvæmt henni var Miguel Mateo Castrillo stigahæstur í liði KA með 10 stig en Jakub Madej stigahæstur hjá Hamri með 15 stig. Næsti leikur KA verður heimaleikur gegn Aftureldingu þann 7. október en Hamar mætir Álftanesi í Hveragerði þann 14. október.