[sam_zone id=1]

Berglind og Elísabet unnu í Kaupmannahöfn

Þær Berglind Gígja Jónsdóttir og Elísabet Einarsdóttir tóku um síðastliðna helgi þátt í Copenhagen Master mótinu á dönsku strandblaksmótaröðinni.

Berglind og Elísabet hafa undanfarin sumur spilað strandblak í Danmörku og hafa náð afar góðum árangri síðustu ár. Mótaröð sumarsins 2021 er þegar farin af stað í Danmörku en fyrir rúmri viku tóku þær stöllur þátt í Århus Challenger mótinu og unnu glæstan sigur. Mótið var það fyrsta sem liðið tók þátt í síðan heimsfaraldurinn skall á og því kærkominn sigur fyrir stelpurnar.

Þessa helgina var svo komið að Copenhagen Master og þar sem þær unnu mótið í Århus léku stelpurnar í efstu deild þar. Master mót sumarsins eru þau stærstu og gefa flest stig í stigakeppni sumarsins. Berglind og Elísabet mættu danska landsliðsparinu Line Trans Hansen og Clöru Windeleff sem voru fyrirfram taldar sigurstranglegastar á mótinu. Stelpurnar töpuðu þeim leik en komust þó í undanúrslitin þar sem liðin mættust öðru sinni.

Í undanúrslitaleiknum unnu Berglind og Elísabet 2-1 sigur og tryggðu sér sæti í úrslitaleiknum. Þar gerðu þær sér lítið fyrir og unnu hitt danska landsliðsparið 2-0 sem tryggði þeim því sigur á öðru mótinu í röð. Næst á dagskrá er Master mót í Odense sem fer fram strax næstu helgi.

Í byrjun júní halda tvö íslensk kvennalið til Skotlands þar sem þau taka þátt í alþjóðlegu móti. Berglind og Elísabet eru annað þeirra en Thelma Dögg Grétarsdóttir og Jóna Guðlaug Vigfúsdóttir taka einnig þátt fyrir Íslands hönd.