[sam_zone id=1]

Glæsilegur sigur á San Marínó

Íslenska kvennalandsliðið í blaki mætti San Marínó í dag á Smáþjóðaleikunum í Svartfjallalandi. Íslensku stelpurnar töpuðu gegn Kýpur í gær 3-0 en San Marínó vann Lúxemborg 3-0 í gær. 

Fyrir leikinn voru gerðar treyjubreytingar þegar Birta Björnsdóttir og Velina Apostolova skiptu um lit. Velina fór í frelsingjatreyju og Birta í venjulega. Byrjunarlið Íslands var skipað þeim Jónu Guðlaugu Vigfúsdóttur og Helenu Kristínu Gunnarsdóttur á köntunum, Unni Árnadóttur og Gígju Guðnadóttur á miðjunum, Ana Maria Vidal Bouza í uppsil, Thelmu Dögg Grétarsdóttur í díó og Kristinu Apostolovu í stöðu frelsingja. 

Stelpurnar okkr voru seinar í gang og San Marínó komst í 9-4 þegar Ísland tók leikhlé. Þær komu af miklu krafti inn í leikinn eftir leikhlé og fengu næstu 8 stig og komust yfir 12:9, eftir glæsilega uppgjafaseríu hjá Unni Árnadóttur. Íslenska liðið var yfir allt þangað til að San Marínó komst yfir í stöðunni 21:20. Jafnt var á öllum tölum eftir það þangað til að Ísland kláraði hrinuna 26:24.

Önnur hrina fór mjög jafnt af stað og aldrei skildi meira en tvö stig liðin að þangað til að Ísland seig fram úr og komst í 17:12 þegar San Marínó tók leikhlé. Ísland hélt áfram að auka við forskotið meðal annars eftir glæsilega uppgjafaskorpu frá Önu Mariu. Ísland kláraði hrinuna þægilega 25:16. 

Íslenska liðið kom inn í þriðju hrinu af miklum krafti og tók San Marínó leikhlé þegar Ísland var 8:1 yfir. Það dugði lítið til því okkar stelpur voru komnar í gang og voru 15:5 yfir þegar San Marínó tók síðara leikhlé hrinunnar. Íslenska liðið spilaði með miklum yfirburðum og kláraði hrinuna 25:11 og þar með leikinn 3:0

Stigahæstar í íslenska liðinu voru Thelma Dögg Grétarsdóttir með 14 stig og Jóna Guðlaug Vigfúsdóttir með 11 stig . Íslenska liðið mætir Lúxemborg á morgun kl. 11 (ísl).