[sam_zone id=1]

HK hafði betur í hörkuleik

Völsungur og HK mættust í Mizunodeild kvenna í dag en leikið var í Húsavík.

Völsungur byrjaði leikinn af miklum krafti og voru heimastúlkur fljótt komnar með 7-1 forustu. HK jafnaði hinsvegar 11-11 eftir góða baráttu og var hrinan nokkuð jöfn eftir það. Völsungur fór hinsvegar að lokum með sigur 25-19. Eftir nokkuð jafna byrjun í annarri hrinu var það HK sem tók völdin og sigraði hana 25-21 eftir flotta sókn frá Elísabetu Einarsdóttur sem fór mikinn í leiknum.

HK snéri svo leiknum sér í hag með sigri í þriðju hrinu 25-23 en aftur var það Elísabet Einarsdóttir sem skoraði síðustu stig HK.

Fjórða hrina var æsispennandi út í gegn en þrátt fyrir að HK hafi náð 17-12 forustu þá gáfust heimastúlkur aldrei upp. Hrinan fór í upphækkun þar sem bæði lið neituðu að gefast upp og skiptust á stigum allt að 35-35. Þá setti HK í lás eftir frábæra hávörn frá hinni ungu og efnilegu Örnu Sólrúnu Heimisdóttur. Hjördís Eiríksdóttir innsiglaði svo sigur HK með góðu smassi sem heimastúlkur réðu ekki við.

HK sigraði því leikinn 3-1 (19-25, 25-21, 25-23, 37-35) og kemur sér því í 39 stig í 2.sæti deildarinnar, 18 stigum ofar en Völsungur sem situr í 3.sæti með 21 stig.

Stigahæst í leiknum í dag var Elísabet Einarsdóttir leikmaður HK með stórleik en hún skoraði 31 stig. Stigahæstar í liði Völsungs voru Rut Gomez og Ashley Nicole Dietrich báðar með 19 stig.

Liðin mætast aftur á morgun kl 13:00